Svendsen-mareritt i vinden då Sverige kneip OL-gullet på stafetten

Noreg og Sverige kom inn saman på siste skyting, men Emil Hegle Svendsen vart fullstendig knust i naboduellen om OL-gullet på skiskyttarstafetten.

Det var så ille at Svendsen måtte ut i strafferunde, mens svenske Fredrik Lindström klarte seg med ekstraskot og kunne gå inn til eit overlegent gull i Pyeongchang.

Sverige hadde aldri før tatt OL-gull på herrestafett i skiskyting. Med kong Carl Gustaf på tribunen kunne svenskane gå inn til siger heile 55,5 sekund framfor sølvvinnar Noreg.

Det vart eit ellevilt drama på standplass då Noreg og Sverige kom inn likt til siste skyting. Der beheldt Lindström roa, mens Svendsen bomma og bomma. Audmjukinga var eit faktum då trønderen måtte ut i strafferunde.

Svendsen berga OL-sølvet, mens Tyskland tok bronse drygt to minutt bak svenskane.

Lars Helge Birkeland skaut bra på opningsetappen, men tapte kraftig i sporet mot slutten og sende Noreg ut heile 24 sekund bak Tyskland.

- Eg gjorde eigentleg det som var jobben min, følte eg. Det var litt tyngre enn eg håpa (i sporet), men det vart køyrt ganske hardt på andrerunden, sa Birkeland.

Tarjei Bø gjekk alt han kunne i sporet for å hente igjen det tapte, men enda med ein fæl liggjande serie og måtte bruke alle dei tre ekstraskota. Storebror Bø måtte bruke ekstraskot også på ståande skyting.

Johannes Thingnes Bøe gjekk ut 31 sekund bak, men herja både i sporet og på standplass og sende ankermann Svendsen ut likt med Sverige.

- Dette kan ein aldri vere trygg på, sa Tarjei Bø om gullmoglegheitene.

Og han fekk rett. Ein kunne ikkje vere trygg i vindkasta.

(©NPK)

Emil Hegle Svendsen måtte gi tapt i gullduellen mot Sverige og Fredrik Lindström.
Foto: Andreas Hillergren / TT / NTB scanpix