Svensk al-Qaida-gissel frigjeven i Mali

Gustafsson blei bortført av islamistgruppa al-Qaida i det islamske Maghrib (AQIM) i oktober 2011.

- Det er med enorm glede eg kan kunngjere at han er sleppt fri og attende med familien sin, seier Wallström til Sveriges Radio.

Ifølgje Aftonbladet kom Gustafsson måndag til Arlanda etter å ha blitt henta i regjeringsflyet. Faren Göran Gustafsson var på veg frå Småland for å møte sonen og ynskjer ikkje å kommentere opplysningane.

Motorsykkel gjennom Afrika

Den svenske 42-åringen var på motorsykkeltur gjennom Afrika då han blei bortført i Timbuktu i Mali. Då hadde han køyrt heilt frå Sverige og var på veg til Sør-Afrika.

Gustafsson var saman med nederlendaren Sjaak Rijke og sørafrikanske Stephen McGowan, som også blei bortførte frå ein kafé i Timbuktu. Ein fjerde person, ein eldre tysk mann som åt lunsj med dei, blei skoten og drepen då han gjorde motstand.

Først to år seinare kom det livsteikn frå Gustafsson i form av ein video sendt ut av al-Qaida i det islamske Maghrib (AQIM). Sidan kom det eit par videoar til.

Spesialstyrkar

Rijke blei frigjort under ein operasjon av franske spesialstyrkar i april 2015, men Gustafssons og McGowans skjebnar har til no vore uviss.

Den sørafrikanske hjelpeorganisasjonen Gift of the Givers (GOTG) har prøvd å forhandle fram ei avtale om frigjeving, men utan hell.

Gisseltakarane kravde både fangeutveksling og millionar i løysepengar, men det er uklart kva fangar dei kravde lauslatne og i kva land dei sit.

Omstenda rundt frigjevinga av Gustafsson er ikkje kjend, og det er heller ikkje kjend om McGowan er sett fri.

Utanriksminister Wallström var i januar i Mali og tok då blant anna opp Gustafssons sak med maliske styresmakter.

Brutale drap

Al-Qaida i det islamske Maghrib (AQIM) blei opphavleg danna i Algerie i 1998 som Salafistgruppa for forkynning og kamp (GSPC). Gruppa har utspring i Den væpna islamske gruppe (GIA), som stod bak titusenvis av brutale drap under den algeriske borgarkrigen frå 1992.

I september 2006 kunngjorde al-Qaida-leiaren Ayman al-Zawahiri at GSPC var blitt ein del av al-Qaida. Få månader seinare endra gruppa namn til AQIM.

Blant GSPCs medlemmer var Mokhtar Belmokthar. Han braut med AQIM i 2012 og danna gruppa Dei som underteiknar med blod. Denne stod bak angrepet mot Statoil-anlegget i In Amenas i Algerie i januar 2013.

(©NPK)

42 år gamle svenske Johan Gustafsson er sleppt fri etter over 2.000 dagar i fangenskap hos ei gruppe tilknytt al-Qaida i Mali. Foto: YOUTUBE / TT / NTB scanpix