Sverige vil sjølv etterforske drap i Kongo

Svensk politi vil sjølv etterforske drapet på den svenske FN-granskaren Zaida Catalán i Kongo.

Catalán og den amerikanske kollegaen hennar Michael Sharp blei nyleg funne døde i ei massegrav i den kongolesiske Kasai-provinsen. Tolken deira låg i same grava, ifølgje regjeringa i Kongo.

Onsdag opplyste svensk politi at dei har igangsett ei eiga etterforsking av saka. Politiet og påtalemakta samarbeider med det svenske utanriksdepartementet om saka.

Utanriksminister Margot Wallström krev at gjerningsmennene bak drapet på Catalán må stillast til ansvar. Statsminister Stefan Löfven seier han reagerte med sorg og sjokk då han fekk vite om dødsfallet.

Catalán og Sharp forsvann 12. mars saman med fleire kongolesarar. FN-granskarane var i Kongo for å undersøkje skuldingar om vald og omfattande menneskerettsbrot gjort av den kongolesiske hæren og militsgrupper.

(©NPK)