Talet på nye asylsøkjarar på sitt lågaste på nesten 20 år

(NPK-NTB): På dei fire siste månadene i fjor blei det sett rekord i talet på asylsøkjarar. Gjennom dei fire første månadene i år har talet stupt med 95 prosent. Lågaste sidan 1997, opplyser UDI.

I siste tertial i fjor kom 22.818 asylsøkjarar, mot 1.185 personar i første tertial i år, viser tal frå Utlendingsdirektoratets (UDI) verksemdsrapport som ABC Nyheter har fått tilgang til.

– Dette er det lågaste talet asylsøkjarar som har kome til Noreg sidan første tertial 1997. Då kom det 499 asylsøkjarar, skriv direktoratet.

UDI slår også fast det låge talet asylsøkjarar «har klar samanheng med grense- og ID-kontrollane i Noreg, Sverige og Danmark og elles i Europa».

Trenden vil truleg fortsette, sidan direktoratet har redusert prognosen på talet på asylsøkjarar i 2016 frå 33.000 til 25.000. (©NPK)