Tennis: Ruud fell på rankinga
Casper Ruud fell ti plassar på verdsrankinga i tennis måndag og ligg no på 147.-plass. Sveitsiske Roger Federer er tilbake på topp.
Den norske 19-åringen spratt opp 20 plassar etter å ha tatt seg til 2. runde i Grand Slam-turneringa i Paris i mai, men etter nedturen i Challengerturneringa i Citta`Di Caltanissetta i Italia fell 19-åringen tilbake ti plassar.
På ATP-rankinga som vart presentert måndag ligg nordmannen på 147.-plass.
- Målet vårt er å komme topp 100 i år. Det er på eit vis ei magisk grense, sa pappa Christian til NTB etter førre ranking.
Denne veka skal Snarøya-guten i aksjon i Challengerturneringa i Poprad Tatry i Slovakia. Der skal Ruud opp mot Lukas Klein i første runde. Slovaken er ranka som nummer 458.
Seinare i sommar skal Ruud spele kvalifisering for Wimbledon (gras). Han har også fått frikort til ATP-turneringa i Båstad (grus, Sverige).
Roger Federer er tilbake på topp etter at han tok sin 98. turneringssiger på ATP-touren då han søndag vann grasturneringa i Stuttgart. Dermed innleier han si 310. veke som verdseinar i karrieren. Ingen andre har hatt posisjonen så mange veker.
Spanske Rafael Nadal, som har trona øvst dei siste månadane, er vist til andreplassen, mens tyske Alexander Zverev er nummer tre.
(©NPK)
Tennisspelaren Casper Ruud fell til 147.-plass på den siste ATP-rankinga. Foto: Cornelius Poppe / NTB scanpix