Terrorfrykt gir auka inntekter til Spania

(NPK-NTB-TT): Terrorfrykt har ført til at turistnæringa i Spania er blitt årets vinnar.

I dei første sju månadane i år kom det 42,4 millionar turistar til Spania, ein auke på 11 prosent frå same periode i fjor, skriv Financial Times.

Avisa viser til tal frå blant anna reisearrangøren Tui, som melder om at mange i år har unngått Tyrkia, Tunisia, Egypt og Frankrike av frykt for terror og auka politisk uvisse.

Etter terrorangrepet i Nice 14. juli har hotellnæringa langs kysten av Sør-Frankrike registrert eit fall på 30 prosent i talet på bestillingar. I Egypt fall talet på besøkjande med over 46 prosent i første kvartal. I Tunisia var nedgangen på 19 prosent i same kvartal. (©NPK)