Tesla-aksjen fall etter sjefens pedofilutspel mot dykkar
Tesla-aksjen fall måndag 3,5 prosent etter at Tesla-sjef Elon Musk skulda ein brite som deltok i grotteoperasjonen i Thailand, for å vere pedofil.
Det var på Twitter at Musk søndag retta kraftige skuldingar mot grotteeksperten Vernon Unsworth. I ei av meldingane blir Unsworth omtalt som «pedo-fyren». På den offisielle Twitter-kontoen sin legg Musk til: «Eg veddar ein signert dollar på at det er sant». Kontoen har 22 millionar følgjarar.
Meldingane kom etter at Musks tilbod om å sende ut ein miniubåt for å redde dei tolv fotballgutane og trenaren deira frå gruva blei karakterisert som eit «PR-stunt» av Unsworth.
Tesla-sjefen har ikkje gitt ei forklaring på skuldinga og har sletta meldingane.
Måndag fall aksjeprisen. Han er no nede på 307,82 dollar, tilsvarande 2.602 norske kroner.
(©NPK)
Oppfinnaren og Tesla-sjefen Elon Musk kalla Thailand-dykkar for pedofil. Dagen etter fall aksjeprisen. Foto: Kiichiro Sato / AP / NTB scanpix