Thingnes Bø spurtslo Svendsen i NM-stafetten
Johannes Thingnes Bø og Sogn og Fjordane var dei nødvendige centimeterane føre Emil Hegle Svendsen og Sør-Trøndelag på 4 x 7,5 km i NM i Mo i Rana.
Medan gullet til mennene gjekk til Sogn og Fjordane, vann Oslo og Akershus 2.-lag NM-gullet i kvinneklassen over 3 x 6 kilometer.
Det blei ein durabeleg kamp mellom Johannes Thingnes Bø og Emil Hegle Svendsen om gullet. Det skilte 0,1 sekund mellom dei to landslagsprofilane til slutt.
I tillegg til yngstebror Bø gjekk også Jarle Midtfjell Gjørven, Ole Martin Erdal og Håvard Gutubø Bogetveit. For Sør-Trøndelag gjekk Ole Andreas Flotten, Andreas Kvam og Andreas Dahlo Wærnes ved sida av ankermann Svendsen.
Bronsen gjekk til Buskerud med Martin Lindland, Vetle Sjåstad Christiansen, Erlend Bjøntegaard og Henrik S. Smeby.
Det var Buskerud som var i leiinga etter tre etappar. Det skilte dryge tre sekund ned til Sør-Trøndelag og med Sogn og Fjordane litt over 15 sekund bak.
I kvinneklassen skulle kampen om gullet stå mellom Oslo og Akershus 1.- og 2.-lag. Rikke Hald Andersen, Thekla Brun-Lie og Kristin Hjelstuen var hakket betre enn Kaia Wøien Nicolaisen, Fanny Horn Birkeland og Ingrid Landmark Tandrevoll.
2.-laget leidde etter 1. etappe og Andersen hadde fått 18 sekund ned til Nord-Østerdal. Oslo og Akershus 1.-lag med Kaia Wøien Nicolaisen hadde to bom på standplassen og hadde 1.24 minutt opp.
Horn Birkeland, som ikkje fekk gå verdscupavslutninga i Holmenkollen, leverte derimot ein solid etappe, og med null bom hadde ho redusert avstanden til 16,5 sekund på Brun-Lie.
Tandrevoll kunne derimot ikkje takle Hjelstuens fart i sporet.
(©NPK)