Ti personar skadd i kollisjon i Hordaland
(NPK-NTB): To barn er kritisk skadde, tre alvorleg skadde og fem har fått lettare skadar i ein kraftig frontkollisjon i Øygarden i Hordaland fredag ettermiddag.
Ulukka skjedde rett nord for brua til Rognøy på riksveg 561, opplyser Vest politidistrikt.
– To barn er kritisk skadde, og dei blei flogne til sjukehus med luftambulanse. Ytterlegare tre er alvorleg skadde, og fem er lettare skadde, seier innsatsleiar Frank Listøl i politiet til BA.
Blant dei skadde er det fire personar under 18 år.
Det var sju personar i den eine bilen og tre i den andre, opplyser operasjonsleiar Lars Geitle til NTB.
Meldinga om ulukka kom ved 17.30-tida. Trafikken blei fredag kveld dirigert forbi staden på ein gangveg. (©NPK)