Trump signerer ordre for å trappa opp oljeboring
USAs president Donald Trump har signert ein presidentordre med sikte på å utvida olje- og gassverksemda i Arktis og opna opp nye leiteområde.
Trump held dermed fram innsatsen for å skrota mange av dei viktigaste klimatiltaka som forgjengaren Barack Obama innførte.
Fredag gav Trump ordre om ein gjennomgang av femårsplanen til landet for olje- og gassverksemd, som blant anna inneber forbod mot boring etter olje og gass i arktiske farvatn.
- Dette er ein storslått dag for amerikanske arbeidarar, vi slepper laus amerikansk energi og banar veg for tusenvis på tusenvis av godt betalte amerikanske energijobbar, sa Trump då han signerte presidentordren.
Femårsplanen som no skal reviderast, blei godkjend av Obama 17. januar, få dagar før han flytta ut av Det kvite hus.
(©NPK)