Trump vil sende tidlegare admiral til Noreg som ambassadør
Kenneth Braithwaite, tidlegare kontreadmiral i den amerikanske marinen, kan bli ny amerikansk utsending til Noreg.
Det kvite hus kunngjorde torsdag at president Donald Trump ønskjer å nominere Braithwaite, som i dag er visepresident i selskapet Vizient. Fleire norske medium formidla torsdag ettermiddag nyheita.
Braithwaite avslutta militærkarrieren sin i 2011 etter 27 års teneste. Han har mellom anna tenestegjort i Irak. Seinare var han sjef for strategisk kommunikasjon ved den amerikanske ambassaden i Pakistan.
Den tidlegare ambassadøren, Sam Heins, gjekk av etter at Trump vann presidentvalet i fjor. Da hadde posten stått tom i to og eit halvt år. Grunnen var at førstevalet til tidlegare president Barack Obama, George Tsunis, fall gjennom i utspørjinga i Senatet.
(©NPK)