TV-serien «Skam» blir tema i Folketinget i Danmark
Den tidlegare danske kulturministeren ber den noverande kulturministeren ordna opp slik at danskane igjen får følgje med på den norske TV-serien «Skam».
Frå 13. januar var det ikkje lenger mogleg for sjåarar i utlandet å sjå den populære NRK-serien «Skam» frå utlandet på grunn av strid om musikkrettane i serien.
Den tidlegare utanriksministeren i Danmark Bertel Haarder er blant dei som reagerer. Han har sendt eit såkalla paragraf 20-spørsmål til kulturminister Mette Bock der han spør om ho vil arbeida for at danske sjåarar på nytt skal få full tilgang til serien.
- Ingenting betyr meir for den gjensidige nordiske språkforståinga enn uhindra tilgang til kanalane til nabolanda. Pippi Langstrømpe har hatt meir å seia enn alle sesjonane i Nordisk råd, skriv Haarder i grunngjevinga for spørsmålet.
- Det var eit stort tilbakesteg då pengeinteresser stoppa den fulle tilgangen danske tenåringar hadde til den norske TV-serien «Skam» på nettsida til NRK, skriv han vidare.
Ministeren må svara på eit paragraf 20-spørsmål innan seks vyrkedagar. Svaret blir då sendt tilbake til spørsmålsstillaren og blir dessutan lagt ut på nettsida til Folketinget.
(©NPK)