Tyrkia ber Tyskland utlevere Gülen-tilhengjarar
(NPK-NTB-AFP): Tyrkiske styresmakter ber Tyskland utlevere tilhengjarar av predikanten Fethullah Gülen.
Tyskland burde utlevere «parallellstatens dommarar og aktorar», seier utanriksminister i Tyrkia Mevlüt Çavusoglu til TV-kanalen CNN Turk.
Den såkalla parallelle staten viser til tilhengjarar av den muslimske predikanten Fethullah Gülen, som tyrkiske styresmakter har skulda for å ha planlagt kuppforsøket tidlegare i juli. Gülen har levd i eksil i USA sidan 1999, og Tyrkia har bedt Washington utlevere han.
Cavusoglu gav i intervjuet med CNN Turk ingen fleire detaljar om kven han meiner tyske styresmakter burde utlevere. (©NPK)