Veka starta med nedtur på Oslo Børs

Hovudindeksen passerte fredag 700 poeng for første gong og enda på 700,85 poeng ved børsslutt. Måndag er det mykje raude tal blant dei mest omsette selskapa, blant dei Seadrill (-8,35), Aker Solutions (-3,96), Petroleum Geo-Services (-2,98), Bakkafrost (-3,92), Subsea 7 (-2,30) og Statoil (-1,19).

Enkelte selskap enda dagen i pluss, og ingen steig så mykje som Golden Ocean Group, som auka 7,56 prosent. Også Norsk Hydro (+0,40), Telenor (0,08), Orkla (+0,32), Gjensidige (+0,15) og DNO (+0,33) steig i verdi måndag.

Fosnavåg-reiarlaget Havila Shipping auka med 3,76 prosent etter at det blei kjent at dei har inngått ein avtale med Haugesund-selskapet Reach Subsea ASA for subsea-fartøyet Havila Subsea i tre år. Kontrakten gjer at eitt av dei mest verdfulle skipa til selskapet er ute av opplag.

Dei europeiske børsane fell også. FTSE 100-indeksen i London fall 0,82 prosent, CAC 40 i Paris fall 0,85 prosent, mens DAX 30-indeksen i Frankfurt gjekk ned 0,91 prosent.

Eit fat nordsjøolje blir omsett for 55,02 dollar, mens tilsvarande mengd amerikansk lettolje blir seld for 52,42 dollar.

(©NPK)