VM-bronse til debutanten Klæbo
Johannes Høsflot Klæbo tok VM-bronse i sprint i den aller første VM-starten sin. Federico Pellegrino frå Italia tok gullet.
Russiske Sergej Ustjugov tok sølvmedaljen, mens Finn Hågen Krogh måtte nøya seg med den sure fjerdeplassen.
20 år gamle Klæbo vann VM-generalprøven i Otepää sist helg og var éin av dei store favorittane før Lahti-sprinten torsdag. Der beit den urutinerte og uredde ungguten svært godt frå seg.
Dermed heldt han gode norske VM-tradisjonar i hevd. Norske løparar har framleis ikkje gått medaljelause frå ein VM-sprint på herresida.
Bronsevinnar Klæbo var for elles nær ved å ryka ut i semifinalen. Då måtte han saman med Petter Northug håpa at tida var god nok til finaleplass. Det viste ho seg å vera.
Northug gjekk seg også til finale torsdag, men var sjanselaus i medaljekampen. Langrennskongen frå Mosvika blei hekta av tidleg og fekk aldri med avgjerda å gjera.
Emil Iversen rauk ut i semifinalen.
- Dette er ein draum. Ikkje vekk meg, sa verdsmeister Federico Pellegrino etter den største arbeidsdagen i karrieren.
Sindre Bjørnestad Skar har vore i alle sprintfinalane i verdscupen denne sesongen. Torsdag gjekk han vidare frå prologen med tredje beste tid, men i kvartfinalen blei det exit også for han.
Skar gjekk i front gjennom heile heatet sitt, men Petter Northug og Sergej Ustjugov passerte han på oppløpet.
-Eg er misnøgd med denne kvartfinalen. Eg gjekk jamt fort og håpar å gå vidare på tid. Det kjennest som om det gjekk fort, sa VM-debutanten til NRK etterpå.
<p></p>
(©NPK)