2,5 milliardar korttransaksjonar i fjor
Bruken av betalingskort held fram å auke. I 2018 vart det gjort til saman 2,5 milliardar transaksjonar med norske betalingskort.
I gjennomsnitt brukte kvar av oss betalingskortet 475 gonger i fjor, ifølgje ferske tal frå Noregs Bank.
Den gjennomsnittlege verdien av korttransaksjonane var 382 kroner.
Samtidig aukar kortbetalingar på internett i samband med netthandel kraftig. Slike betalingar utgjer no 12 prosent av alle betalingar med norske kort.
Også talet på mobilbetalingar aukar sterkt, frå 91 millionar betalingar i 2017 til 141 millionar i fjor.
- Ein større del av mobilbetalingane blir no belasta bankkonto direkte, og dei fleste av desse går gjennom infrastrukturen til Straksbetalingar, skriv Noregs Bank torsdag.
I 2017 vart det gjennomført omkring éin million Straksbetalingar, medan talet i fjor hadde auka til 58 millionar.
Infrastrukturen for kontantar blir stadig vidare nedbygd. Talet på uttak frå minibankar og som cash-back i butikkar fall med høvesvis 13 og 18 prosent frå 2017 til 2018. Nedgangen i uttak av kontantar har vore spesielt kraftig dei siste par åra.
(©NPK)
Kortbetaling erstattar i stadig større grad betaling med kontantar i Noreg. Foto: Jon Olav Nesvold / NTB scanpix