380 grindkvalar døydde på Tasmania
Trass ihuga redningsinnsats har 380 grindkvalar bukka under etter å ha stranda langs kysten av Tasmania i Australia.
Redningsarbeidarar har klart å redde 50 kvalar og 30 er truleg i live, opplyser Nic Deka i australske miljøstyresmakter.
Marinbiologar meiner det aldri tidlegare har stranda så mange kvalar i Australia.
Alarmen gjekk måndag då 270 kvalar stranda på tre ulike stader ved Macquarie Harbour. Ytterlegare 200 kvalar vart onsdag morgon funne døde 7–10 kilometer lengre sør.
Den utfordrande redningsaksjonen starta tysdag. Eit mannskap på om lag 60, med blant anna frivillige og fiskarar, deltek og prøver å redde dei kvalane som har best sjanse til å overleve.
– Vi vil halde fram innsatsen for å frigjere så mange dyr som vi kan. Vi vil halde fram med å jobbe så lenge det er levande dyr, seier Deka.
Krevjande redningsarbeid
I redningsaksjonen blir store slyngjer festa til båtar brukt. Men arbeidet er svært krevjande for dei som prøver å hjelpe kvalane. Dei står i kaldt vatn opp til brysthøgd, og må gjere jobben på skift.
– Det er utmattande både fysisk og kjenslemessig, seier Deka.
Det er ikkje uvanleg at kvalar strandar på Tasmania, men talet denne gongen er sjeldan høgt. Det er meir enn ti år sidan sist over 150 kvalar stranda på denne måten.
Umogleg å hindre
Marinbiolog Kris Carlyon seier dei ikkje veit kvifor kvalane stranda, men at det kan komme av eit uhell eller feilnavigasjon.
– Det er nær sagt umogleg å hindre slike hendingar. Det er ikkje noko som tyder på at dette har ei menneskeleg årsak. Dette er eit naturfenomen, seier Carlyon.
Han fortel at kval har stranda òg før menneska byrja å vandre på jorda. Det finst òg fossil av slike stranda kvalar.
(©NPK)
Redningsmannskap, med blant andre frivillige og fiskarar, prøver å redde dei stranda kvalane i Macquarie Harbour på Tasmania. Til saman har om lag 470 grindkvalar stranda på vestkysten av øya. Foto: Brodie Weeding / pool via AP / NTB
Grindkvalar ligg på rekkje og rad utanfor kystbyen Strahan på Tasmania i Australia. Om lag 470 kvalar stranda i området, og onsdag var det klart at minst 380 av dei er døde. Foto: Australian Broadcast Corporation / AP / NTB