Alliansens talmannkandidat møter motstand
Den borgarlege Alliansen i Sverige har lansert Andreas Norlén frå Moderaterna som ein felles kandidat til posten som talmann i Riksdagen. Men han får motstand.
Talmannen svarar til stortingspresidenten her til lands. Det er knytt stor spenning til kven som blir talmann i Riksdagen, ettersom vedkommande har ansvaret for å finne ein statsminister.
Gruppeleiarane frå dei fire partia i Alliansen varsla på ein felles pressekonferanse fredag at Norlén, leiar av Riksdagens konstitusjonskomité, er deira kandidat til posisjonen.
Men berre halvannan time seinare varsla Socialdemokraterna at partiet fremmar ein eigen kandidat, nemleg parlamentarikaren Åsa Lindestam.
- Vi har prøvd å samarbeide over blokkgrensa. Dessverre har ikkje alliansepartiae vore interesserte i å føre slike samtalar, seier Socialdemokraternas gruppeleiar Anders Ygeman.
Første post på programmet når den nye Riksdagen samlar seg måndag, er at dei folkevalde klokka 11 skal stemme fram ein ny talmann.
Tradisjonelt har det største partiet i Sverige fått stillinga som talmann. Socialdemokraterna vart største parti i valet. Alliansen meiner likevel det tel meir at dei er det største reelle regjeringsalternativet etter valet.
Vänsterpartileiar Jonas Sjöstedt reagerer kraftig på at Moderaterna og Alliansen lanserer sin eigen talmannkandidat.
- Heilt urimeleg at Moderaterna, som tapte valet, og borgaralliansen, som er mindre enn dei raudgrøne, vil ta talmannposten. Kjem Socialdemokraterna opp med ein motkandidat, så stemmer vi på den, skriv han på Twitter.
(©NPK)