Annankvar alvorleg skadde får ikkje luftambulanse

– Vi er overraska over at evna til å plukke ut pasientar som treng helikopter er så dårleg som den ser ut til å vere, seier Torben Wisborg til Nationen. Han er professor ved Universitet i Tromsø og leiar for Nasjonal Kompetanseteneste for Traumatologi ved Oslo universitetssjukehus.

Undersøkinga han og tre forskarkollegaer står bak, slår fast at hardt skadde pasientar med behov for luftambulanse og anestesilege ikkje har fått det. Alvorleg skadde pasientar betyr i denne samanheng pasientar med ein tilstand som éin av fem døyr av.

Berre 51 prosent av pasientane som kom til sjukehus med alvorleg skade i 2013, hadde fått hjelp av anestesilege under transport med bil eller luftambulanse.

Og det er ikkje ressursane det står på. Noreg har 19 ambulanse- og redningshelikopter med anestesilege på vakt døgnet rundt, 365 dagar i året. Også bilambulanse kan bemannast med anestesilege ved behov.

– Ressursane er kjempebra. Utfordringa er å fordele dei rett. Vi må forvente at vi brukar luftambulanse til dei rette pasientane, seier professoren. (©NPK)