Atombråk i vente for Huitfeldt
Den nye regjeringa i Tyskland vil slå følgje med Noreg og gå inn som observatør til FN-traktaten om atomvåpenforbod. No blir saka tema i Nato.
– Eg ventar at også forbodstraktaten vil bli adressert.
Det stadfestar Nato generalsekretær Jens Stoltenberg i forkant av utanriksministermøtet til alliansen i Riga tysdag og onsdag neste veke.
Ifølgje Stoltenberg vil saka truleg komme opp som del av ein breiare diskusjon om rustningskontroll som er planlagd under ministermøtets første dag.
NTB er kjent med at både Noreg og Tyskland kan vente hard medfart frå atomvåpenmakter på møtet. Det er utanriksminister Anniken Huitfeldt (Ap) som representerer Noreg, medan Tyskland sender utanriksminister Heiko Maas. Han representerer den avtroppande storkoalisjonen i Tyskland, men tilhøyrer det sosialdemokratiske partiet SPD og blir òg venta å få ei rolle i den påtroppande regjeringa.
Den påtroppande trafikklyskoalisjonen i Tyskland varslar i regjeringsplattforma si at den til liks med Ap-Sp-regjeringa i Noreg vil delta som observatør når landa som har underteikna FN-traktaten om atomvåpenforbod, samlast til sitt første partsmøte i Wien neste år.
Det har vekt reaksjonar i Nato, og Stoltenberg understrekar at det framleis er semje i alliansen om at medlemslanda ikkje kan underteikne traktaten.
– Men det er ulike syn på å observere han, konstaterer han.
(©NPK)
Utanriksminister Anniken Huitfeldt (Ap) deltek neste veke på Nato utanriksministermøte i Riga. Foto: Torstein Bøe / NTB