Bohinen ny Stabæk-trenar: – Ei spennande moglegheit

Han er klar til å leie laget mot Start til søndag, opplyser Stabæk i ei pressemelding.

– Vi er veldig fornøgde med å få Lars på plass. Det har vore eit par hektiske dagar, men no er vi glade for å komme i mål. I Lars får vi inn ein veldig rutinert trenar som har stått i denne situasjonen fleire gonger tidlegare, så vi gler oss til ein spennande haustsesong saman med Lars, seier sportssjef Torgeir Bjarmann om tilsetjinga.

Tysdag vart det klart at Eirik Kjønø var ferdig som Stabæk-trenar.

– Spennande moglegheit

Bohinen var sportssjef i klubben frå 2007 til 2009.

– Heile klubben og historia gjer dette til ei spennande moglegheit for meg, og så likar eg den utfordringa det blir å skape dei prestasjonane her som gjer at vi får dei resultata vi treng, seier Bohinen.

Bohinen leidde Sarpsborg 08 i sin siste jobb. Den kontrakten gjekk ut etter sesongen 2021. Han har tidlegare hatt ansvaret for Asker, Sandefjord og Aalesund.

Stabæk ligg på 5.-plass med 34 poeng når det står att ti kampar. Det er fire poeng opp til direkte opprykk for bæringane.

– Betre prestasjonane

Denne sesongen har Bohinen følgt Stabæk som ekspert for Discovery.

– Eg har jo sett mange av kampane til laget og meiner potensialet i troppen på mange måtar står i stil med dei målsetjingane vi har. Samtidig ligg vi på femteplass akkurat no, og det er nok det vi fortener akkurat no, ut frå prestasjonane, seier han.

– Det klare målet er å betre prestasjonane. Vi kan ikkje ha så sterkt søkjelys berre på resultat, vi må ha søkjelys det som skaper resultata: prestasjonar, utvikling og det som skjer i kvardagen, seier Bohinen.

Fakta om Lars Bohinen

• Fødd: 8. september 1969 (52 år)
• Idrettsgrein: Fotball
• Klubbar som trenar: Asker (2012-13), Sandefjord (2014-17), Aalesund (2017-20), Sarpsborg 08 (2021) og Stabæk (2022-)
• Klubbar som spelar: Bærum, Lyn, Vålerenga, Viking, Young Boys, Lillestrøm, Nottingham Forest, Blackburn, Derby, Lyngby, Farum.
• Har 49 A-landskampar for Noreg og 10 mål.
• Aktuell: Vart fredag ny hovudtrenar for Stabæks og har signert ein avtale som strekkjer seg ut 2023.

(©NPK)

Lars Bohinen tar over Stabæk.
Foto: Christoffer Andersen / NTB