Bombegruppa har undersøkt eksplosiv i Sola
Bombegruppa i politiet har undersøkt eksplosiva som onsdag vart funne i eit hus i Sola kommune. Ein mann i 20-åra er sikta for oppbevaring.
Beredskapsressursar frå den nasjonale bombetenesta kom til huset i 12-tida torsdag. Dei har funne og undersøkt sprengstoffet, skriv Stavanger Aftenblad.
- Sprengstoffet er av ein slik art at det kan fraktast bort for destruksjon, seier politiadvokat Sundas Arshad i Rogaland politidistrikt.
Bombegruppa vil gjere vidare undersøkingar i bustaden på Skadberg i Sola.
Ein mann i 20-åra er sikta for ulovleg omgang med eksplosiv. Han sit i arrest og vil bli framstilt for varetektsfengsling fredag, opplyser politiadvokaten.
Funnet av eksplosiva vart gjort i samband med ei husransaking etter at mannen vart mistenkt for å køyre i ruspåverka tilstand. Dette er andre gongen på kort tid at mannen blir sikta for oppbevaring av sprengstoff.
Mannen vart arrestert og sikta for å ha lagra sprengstoff på same adressa i april i år. Då fann politiet store mengder dynamitt og kunstgjødsel i bustaden. Saka er framleis under etterforsking.
(©NPK)