Brækhus signerte den største avtalen i karrieren
Boksardronninga Cecilia Brækhus har inngått ein stor sponsoravtale med eit spelselskap. Pengane skal gå til den sportslege satsinga.
Avtalen med spelselskapet Betsson sørgjer for at Brækhus ikkje treng å spare på noko i forkant av returkampen mot Jessica McCaskill, heiter det i ei pressemelding.
Amerikanske McCaskill sørgde for at Brækhus' gjekk på det første tapet i karrieren i august. Før det hadde Brækhus sigra i 36 strake proffkampar.
– Eg veit at eg framleis er den beste kvinnelege boksaren i verda, og det gler eg meg til å bevise når eg igjen møter McCaskill. Eg er svolten som aldri før, seier Brækhus, som ønskjer å vinne att tittelbelta sine.
Til VG vil 39-åringen ikkje røpe kor mykje pengar det er snakk om, men ho stadfestar at avtalen er den største så langt i karrieren hennar. Avtalen vil vare fram til sommaren 2021.
Kampen mot McCaskill er planlagd å gå første del av 2021.
(©NPK)
Cecilia Brækhus har inngått sponsoravtale med eit spelselskap. Foto: Ed Mulholland / Matchroom / NTB