Brasils nye trenar vil sikre VM-plass

Han overtek etter Carlos Dunga som fekk sparken sist veke etter at Brasil rauk tidleg ut av Copa America med tap for Peru.

Aldri før er Brasil blitt heimsendt frå Copa America etter det innleiande gruppespelet.

I VM-kvalifiseringa har det heller ikkje gått heilt etter boka. Den femdobbelte verdsmeisteren er per i dag ikkje blant dei laga som er vidare til turneringa i Russland om to år.

– Vi er ikkje innanfor kvalifiseringssona. Eg trur at vi skal klare å komme dit, men det er alltid ein risiko for at ein ikkje klarer det. Eg har fått jobben fordi Brasil ikkje har fått dei resultata som vi ønskjer. Det viktigaste framover blir å konsentrere seg om kvalifiseringa, sa Tite, den tidlegare Corinthians-trenaren som eigentleg heiter Adenor Leonardo Bacchi.

Brasil er den einaste nasjonen som har vore i alle VM-sluttspela sidan det første vart arrangert i 1930. (©NPK)