Casper Ruud sette familierekord: – Beklagar pappa

Etter sigeren i Argentina søndag rykte Casper Ruud opp heile elleve plasseringar til 34.-plass på siste ATP-ranking. Beste for far Christian Ruud var 39.-plass.

Den norske tennisproffen vann ei ATP-turnering som første nordmann søndag. Han var ranka som nummer 45 før siste vekes bravadar. Det har berre vore eit tidsspørsmål om når han ville passere farens «all time high», 39.-plassen frå 1995.

– Beklagar pappa … men rekordar er til for å bli brotne, skreiv tennisstjerna på Twitter måndag.

Ruud er blant spelarane som avanserte mest blant dei 50 beste på rankinga. Berre briten Kyle Edmunds, som klatra 17 plassar, har eit større avansement. Rankinga blir framleis toppa av Novak Djokovic føre Rafael Nadal.

Tysdag skal Ruud i aksjon i ATP 500-turneringa i Rio de Janeiro. Der møter han den italienske kvalifiseringsspelaren Gianluca Mager i 1. runde. Vinn han, kan det bli gjensyn med finalemotstandaren på søndag Pedro Sousa frå Portugal.

Deretter blir motstanden truleg tøffare. I ein mogleg kvartfinale er verdsstjerna Dominic Thiem ein sannsynleg motstandar.

Austerrikaren Thiem er toppseeda i turneringa. Han tapte finalen i Australian Open for Novak Djokovic i byrjinga av februar. Thiem er nummer fire på siste ATP-ranking.

I fjor spelte Ruud seg til kvartfinalen i Rio-turneringa, og han har 110 ATP-poeng å forsvare denne veka.

(©NPK)

Casper Ruud jublar etter at sigeren i Buenos Aires søndag var i boks. No gjer han eit nytt byks på siste ATP-ranking. Foto: Gustavo Garello / AP / NTB scanpix