Cavendish spurta inn til ny siger

På ein særdeles treg etappe frå Granville til Angers hadde spurtkanonene meir enn nok energi då det skulle avgjerast i ein massespurt. Der vart det nærast dødt løp mellom Cavendish og Greipel. Målfoto viste at briten var hårfint framfor, og dermed tok han sin andre siger i årets Tour de France. Cavendish vann også opningsetappen laurdag.

Edvald Boasson Hagen gjorde manns jobb som opptrekkjar for Cavendish.

Sondre Holst Enger vart best av dei norske. IAM køyrde igjen for Horten-guten som hadde fin posisjon då spurten drog seg til.

Kristoff måtte som venta, klare seg utan ein forslått Michael Mørkøv i innspurten og skulle etter planen finne vegen til mål utan opptrekk. Nøkkelen var å vere i rett posisjon i den siste svingen 300 meter før mål, men 28-åringen vart sperra inne.

Etter to innhaldsrike opningsetappar av årets Tour de France, vart den 223,5 kilometer lange etappen tilbakelagt i eit ekstremt roleg tempo utan nokon alvorlege velt.

Franskmannen Armindo Fonseca rykte fem minutt etter start. Han opparbeidde seg eit forsprang på 11 minutt på eit saktegåande hovudfelt etter 37 kilometer. Etter kvart fekk Fortuneo-Vital-ryttaren selskap av landsmann Thomas Voeckler.

Hovudfeltet virket ikkje spesielt uroa for dei to, men dryge 105 kilometer før mål vart det endeleg litt action då spurtane skulle gjere opp om resten av poenga på den innlagde mellomspurten. Kristoff klemte til og henta 13 poeng som andremann bak Marcel Kittel.

Åtte kilometer før mål vart Fonseca og Voeckler henta inn, slik at spurtarane kunne gjere opp seg imellom på den siste kilometeren. Der var Dimension Data og Mark Cavendish sterkast. (©NPK)