Djokovic og Nadal enkelt vidare i Roland-Garros
Tennisstjernene Novak Djokovic og Rafael Nadal trong begge berre tre sett på å overvinne motstandarane sine i 3. runde av Grand Slam-turneringa Roland-Garros.
Det betyr at dei er ein siger kvar unna å møte kvarandre til ein svært stjernetung kvartfinale
Med siffera 6-3, 6-3, 6–2 gjorde verdseinar Djokovic kort prosess med slovenske Aljaz Bedene. I åttedelsfinalen ventar 15.-seeda Diego Schwartzman (Argentina) som slo Grigor Dimitrov (18.-seeda) i tre strake sett med siffera 6-3, 6-1, 6–2.
Nadal på si side slo nederlandske Botic van de Zandschulp 6-3, 6-2, 6–4 og møter canadiske Felix Auger-Aliassime i åttedelsfinalen. Canadiaren er seeda som nummer ni i Paris.
Nadal har vunne Roland-Garros 13 gonger, og er mestvinnande herrespelar på Grand Slam-nivå med dei 21 titlane sine.
Djokovic står med 20 triumfar på det øvste nivået til tennissporten.
Casper Ruud møter italienske Lorenzo Sonego i 3. runde laurdag. Nordmannen har aldri før avansert til åttedelsfinale i Grand Slam-samanheng.
(©NPK)
Novak Djokovic tok seg fredag enkelt vidare til åttedelsfinalen i Roland-Garros. Foto: Thibault Camus / AP / NTB