Dobbelt norsk i slopestyle: Ruud tok VM-gullet framfor Nummedal

Med 90,75 poeng kunne bærumsguten Ruud juble for gull. Han fekk til eit godt første «run», men vart ikkje påskjønt med leiing. Dermed måtte han levere i finaleomgangen, og det gjorde han. Med lite feil og flotte triks sikra han sigeren.

Ruud hadde eitt VM-sølv i slopestyle frå før, medan han er regjerande olympisk meister i big air. Tysdag fekk han også VM-gullet sitt.

Christian Nummedal leverte også knallsterkt og tok den første meisterskapsmedaljen sin då han sikra andreplassen med 87,08 poeng. Han fall i sitt første forsøk, men slo sterkt tilbake i andre forsøk. Hakadal-utøvaren vart påskjønt med ein svært god poengsum.

Sebastian Schjerve var ein medaljefavoritt i finalen etter å ha vorte trear i kvalifiseringa. Han bomma i første forsøk, men i «run» nummer to fekk han 81,85 poeng. Det heldt til 5.-plass.

Tormod Frostad enda på 15.-plass med 35,05 poeng etter å ha bomma i begge forsøka sine.

Ruud vann si kvalifisering med poengsummen 91,50 og var ein klar gullkandidat i finalen. Der fekk han konkurranse frå ein landsmann.

Ruud vann verdscuprennet i slopestyle i USA tidlegare i februar. Då hadde han Schjerve rett bak seg på resultatlista. Ruud vart nummer fem i OL i fjor.

VM blir avslutta med big air for dei norske friskiherrane søndag.

(©NPK)

Friskikøyrar Birk Ruud tok VM-gull i slopestyle tysdag.
Foto: Erik Flaaris Johansen / NTB