Ein av dei rikaste i verda er død

Milliardæren David Koch, den ellevte rikaste mannen i verda og ein viktig bidragsytar til konservative saker i USA, døydde fredag - 79 år gammal.

Amerikanske Koch var, saman med broren sin Charles, kjent for dei rause donasjonane sine til Det republikanske partiet og støtte til ei rekke konservative grupper og organisasjonar.

Det enorme politiske nettverket som Koch-brørne bygde opp, fekk etter kvart tilnamnet «Kochtopus» for den vidtrekkande innverknaden sin i dei konservative rekkene.

David Koch donerte spesielt store summar til inntekt for kreftforsking.

- Eg vart tidleg i livet lært at det å involvere seg i den offentlege diskursen, er ei borgarplikt, skreiv han i 2012.

Koch-brørne, med ein samla formue på over 50 milliardar dollar (nærare 450 milliardar kroner), kom i 2012 på delt fjerdeplass på Forbes' liste over USAs rikaste menn.

I 2019 står David Koch oppført som den ellevte rikaste i verda, ifølgje Forbes.

(©NPK)

Filantrop og milliardær David Koch døydde fredag, 79 år gammal. Foto: Phelan M. Ebenhack / AP / NTB scanpix