Enden på visa for Bergen Frp

Bergen Frp er historie etter eit vedtak frå Frps sentralstyre fredag.

– Bakgrunnen er mange og lange interne konfliktar i lokallaget i Bergen, seier generalsekretær Fredrik Färber i ei pressemelding Bergens Tidende har attgjeve.

I slutten av november kulminerte krangel og konfliktfylte møte, offentleg utskjelling og etterdønningar av katastrofevalet i at fylkesstyret i Vestland Frp bad om å få ta over drifta av Bergen Frp.

Vestland Frp får no ønsket oppfylt, og dermed blir alle Bergens Frps 481 betalande medlemmer overført til fylkeslaget. Fylkesstyret tar òg over leiinga og forvaltninga av eigedelar og partikasse.

Sentralstyret består av partileiinga og representantar frå ulike delar av landet.

(©NPK)

Partileiar Siv Jensen på Frps landsmøte i 2018 med generalsekretær Fredrik Färber. Arkivfoto: Vidar Ruud / NTB scanpix