England blir straffa for finalebråket i EM – får tilskodarnekt og kraftig bot
Englands fotballforbund (FA) får ein reprimande for kaoset på Wembley i EM-finalen i sommar. Herrelandslaget må spele minst éin heimekamp bak lukka dører.
Det europeiske fotballforbundet (Uefa) har i tillegg gitt FA ei bot på 100.000 euro. Det svarer til 977.000 kroner.
Tilskodarnekten slår inn i Englands neste heimekamp som blir spelt i Uefa-regi. Det betyr at laget spelar for tomme Wembley-tribunar i nasjonsligaen i juni neste år. Englands siste heimekamp i VM-kvalifiseringa mot Albania 12. november blir ikkje ramma sidan den er underlagt Det internasjonale fotballforbundet (Fifa).
Blir det nye scener med uro på Wembley dei to neste åra, vil FA automatisk bli straffa med ein kamp til utan publikum.
Det var mykje bråk og til dels stygge scener både på utsida og innsida av Englands nasjonalarena før og under EM-finalen 11. juli. Mellom anna braut mange utan billett seg inn på tribunane.
Uefas disiplinærkomité peikar på fleire forhold som bidrog til å fastsetje storleiken på bota. I tillegg til manglande orden på og utanfor stadion får FA òg svi for tilfelle av banestorming, kasting av gjenstandar ut på bana og bråk under avspeling av nasjonalsong.
Italia slo England etter straffesparkkonkurranse og vart europameister.
(©NPK)
England-spelarane må spele ein heimekamp på Wembley utan tilskodarar. Foto: Kirsty Wigglesworth / AP / NTB