Erling Braut Haaland på verdslaget i Fifa-kåring

Det vart plass for Erling Braut Haaland (21) då Fifa presenterte årets lag under prisgallaen «The Best» måndag.

Der fekk jærbuen selskap av superstjerner som Cristiano Ronaldo, Robert Lewandowski og Lionel Messi.

Haaland har vore ein enorm målskårar dei siste åra. Sist sesong var han den mestskårande spelaren i Champions League med ti fulltreffarar for den tyske klubben Borussia Dortmund. Han har gjort fleire klubbmål (78) enn spelte kampar (77) sidan overgangen frå Salzburg.

«The Best»-showet vart arrangert virtuelt frå Fifa-hovudkvarteret i Zürich. Dei ulike prisane vart delte ut for tidsrommet oktober 2020 til august 2021.

Haaland var blant dei ti nominerte i kåringa av årets beste mannlege fotballspelar, men nådde ikkje opp då finalefeltet vart redusert til tre mann. Robert Lewandowski (Bayern München), Lionel Messi (Paris Saint-Germain/Barcelona) og Mohamed Salah (Liverpool) stod igjen i dragkampen.

(©NPK)

Erling Braut Haaland (t.v.) jublar med Jude Bellingham etter ei skåring for Borussia Dortmund nyleg. Foto: Martin Meissner / AP / NTB