Fengselstilsette streika i to timar

Måndag la 4.400 fengselstilsette i Noreg ned arbeidet i to timar i protest mot forslaget regjeringa hadde til statsbudsjett.

Dei innsette vart låste inne eller måtte klare seg sjølve under den to timar lange politiske streiken. Likevel støttar dei innsette streiken. Straffedes Organisasjon i Noreg (SON) reagerer på det dei kallar underbudsjettering.

- Vi har sett klart at fangane i fengsla har lidd under denne underbudsjetteringa, og vi har innsett at vi har felles interesser med dei tilsette i fengsla, skriv SON i ei pressemelding.

- SON vil derfor uttrykkje si fulle støtte til fagforeiningane til dei fengselstilsette, som går til politisk streik mot statsbudsjettet i to timar måndag 22. oktober med tittelen «Stopp nedleggelsene av fengsler - stopp effektiviseringskuttet».

Ifølgje forslaget til statsbudsjett for neste år skal sju fengselsavdelingar i Sør-Noreg avviklast. Det betyr at minst 150 tilsette kan miste jobben, ifølgje Kriminalomsorgens Yrkesforbund, som tok ut 1.700 medlemmer i streik. I tillegg tok LO-forbundet Norsk Fengsels- og Friomsorgsforbund (NFF) 2.700 medlemmer ut i streik.

Bakgrunnen for det foreslåtte budsjettkuttet er mellom anna at fleire dømde sonar med fotlenke, og at det ikkje lenger skal vere behov for soningsplassar med lågt tryggleiksnivå.

(©NPK)

Ullersmo fengsel i Ullensaker kommune i Akershus. Foto: Terje Pedersen / NTB scanpix.