Finland melder om det andre virustilfellet sitt
Finland har registrert det andre tilfellet av covid-19-viruset i landet. Det dreier seg om ei finsk kvinne som nyleg var i Milano.
Kvinna er no innlagd på sjukehus i Helsingfors. Ho har feber, men skal elles ha det bra.
Ifølgje finske helsestyresmakter har ho berre vore i kontakt med to andre personar sidan ho kom tilbake til Finland i helga, melder rikskringkastinga YLE.
Det første virustilfellet i Finland vart registrert i slutten av januar. Den smitta var ei 32 år gammal kvinne frå Wuhan-området i Kina. Ho har no forlate sjukehuset.
(©NPK)