Fleirbruksanlegg nedbrent i Rogaland
Eit fleirbruksanlegg i Vats i Vindafjord kommune i Rogaland er heilt nedbrent etter ein kraftig brann natt til måndag.
Sørvest politidistrikt fekk melding om brannen i Vindafjordhallen klokka 2.16.
- Bygget er heilt brent ned. Det er berre nokre murvegger og eit stupebrett som står igjen. Det brenn litt enno, så brannvesenet kjem til å bli der ei stund framover, sa operasjonsleiar Jøran Solheim i Sørvest politidistrikt til NTB klokka 5.15.
Då politiet og brannvesenet kom staden, stod det flammar ut av taket på bygget.
Fleirbruksanlegget bestod av forsamlingslokale, treningsanlegg og symjebasseng, skriv Haugesunds Avis.
- Brannen tok seg opp etter at vi kom. Flammane tok fatt i heile bygget og spreidde seg sånn at det var vanskeleg å sløkke brannen, seier Solheim.
Han seier dei fekk meldingar om at det skulle vere propanflasker i eller ved bygget, men det er førebels ikkje stadfesta.
Årsaka til brannen er førebels ukjend.
(©NPK)