Framleis vassføring på oransje nivå
På grunn av regn og snøsmelting i helga blir det framleis oransje nivå på vassføringa i vassdraga i Sogn og Fjordane og Ottavassdraget.
Vassføringa har kulminert på raudt nivå fleire stader, og den er venta å minke noko utover dagen til oransje nivå i Sogn og Fjordane, opplyser Noregs vassdrags- og energidirektorat (NVE).
Lovatn og Strynevatnet har også kulminert, men vil framleis liggje på raudt nivå ut dagen. Det er venta lite nedbør og kjøligare vêr dei nærmaste dagane.
I Ottavassdraget er vassføringa redusert oppstraums Vågåvatn. I Vågåvatn stig vasstanden framleis. Den er venta å kulminere i løpet av dagen, men vil halde seg på raudt nivå.
Vassføringa ved Lalm, nedanfor samløpet mellom Otta og Finna, har flata ut opp mot raudt nivå og vil halde seg på det nivået utover dagen inntil vassføringa ut av Vågåvatn har begynt å minke vesentleg.
(©NPK)
Flaumramma Trond Brandsar sjekka måndag huset sitt i Bismo i Skjåk. Foto: Ørn Borgen / NTB scanpix
Mange hus er ramma av flaumen i Bismo i Skjåk. Foto: Ørn Borgen / NTB scanpix