Fullt på Ullevaal under Sverige-kampen
Berre 200 billettar er tilgjengelege til EM-kvalifiseringskampen mellom Noreg og Sverige på Ullevaal. Det blir stinn brakke på landskamparenaen tysdag.
Det stadfestar Norges Fotballforbund overfor NTB måndag.
Dermed byrjar det verkeleg å haste for dei som vil sjå Noregs kamp mot Sverige.
Kapasiteten på Ullevaal stadion er litt over 26.000 tysdag. Nokre sete går bort på grunn av såkalla tryggingssoner.
Sist det var så godt som utselt på Ullevaal for A-landslaget var mot Tyskland i VM-kvalifiseringa i 2016. Då såg 26.793 tilskodarar at det norske laget vart statistar.
(©NPK)
Landslagstrenar Lars Lagerbäck og Martin Ødegaard kan glede seg over fullt hus på Ullevaal tysdag. Foto: Erik Johansen / NTB scanpix