Fylkesordførar etterlyser nasjonal munnbind-tilråding
Fylkesordføraren i Vestland meiner regjeringa burde komme med ei nasjonal tilråding om munnbind i kollektivtrafikken og ikkje berre for Oslo og Indre Østfold.
– Folk i Bergen synest òg at det er ubehageleg å stå for tett saman. Eg tolkar styresmaktene slik at dei meiner smitterisikoen her er låg, elles hadde dei nok gitt andre råd. Men det er eg i tvil om er rett, seier fylkesordførar Jon Askeland (Sp) i Vestland til NRK.
Han meiner at styresmaktene bør gi eit nasjonalt påbod eller råd om å bruke munnbind i kollektivtrafikken.
– Det er det einaste som alle kjem til å følgje. Det såg vi i vår, påpeikar han.
Også Kollektivtrafikkforeningen stiller seg bak Askeland.
– Der ein ikkje kan unngå å vere nær andre, bør det komme råd om å bruke munnbind, seier dagleg leiar Olov Grøtting, som også ber alle som ikkje må ta kollektivt, om å unngå dette.
(©NPK)
Fleire tek til orde for at regjeringa burde komme med eit nasjonalt råd om bruk av munnbind i kollektivtrafikken. Foto: Marit Hommedal / NTB scanpix