Fylkesrådet i Viken vil bruke 20 millionar på ekstra skuleskyss

Fylkesrådet har bede fylkestinget om godkjenning til å bruke 20 millionar kroner ut året på å auke kapasiteten på skuleskyssen. Fylkesrådsleiar Tonje Brenna vil at midlane blir brukte på ekstra skulebussar som blir sette inn så raskt som mogleg.

– Mange av elevane våre reiser med fulle bussar der det er vanskeleg å halde avstand, og vi må gjere alt det vi kan for at det skal vere trygt å reise til og frå skulen, seier Brenna i ei pressemelding onsdag.

Kollektivselskapa i fylket har ikkje økonomisk handlerom til å setje inn ekstra skulebussar i det omfanget som blir kravd, og fylkesrådet ber derfor om at midlane blir tekne frå reservefondet frå Viken fylkeskommune.

Brenna seier dei forventar å få dette kompensert frå staten.

I Viken er det cirka 34.000 elevar i vidaregåande skular som har rett til gratis skyss. I tillegg kjem elevar frå grunnskulane, der også mange reiser med det same busstilbodet som elevar frå vidaregåande skular.

Mange av dei vidaregåande skulane i Viken er på raudt nivå.

(©NPK)

Fylkesrådet i Viken ønsker å bruke 20 millionar kroner ut året på å auke kapasiteten på skuleskyssen. Foto: Thomas Brun / NTB