Giske: - Openbert at det er ein maktkamp

Trond Giske (Ap) meiner det ligg ein maktkamp bak etter at det vart spreidd ein video av han og ei kvinne på ein utestad i Oslo.

- Det er openbert at det er ein maktkamp når det blir sendt ein SMS med ein trussel om at dersom eg ikkje blir vraka av valkomiteen, så vil VG vere interessert i videoen. Og så blir eg innstilt til eit verv, og seinare hamnar den videoen i VG, seier Giske til NRK.

I intervjuet seier Giske òg at han kjem til å fortsetje med politikk.

Han kallar videoen uproblematisk.

- Det kom mange bort som ville ha bilde og selfies, seier Giske.

Han seier at han ikkje ser nokon samanheng mellom denne hendinga og dei tidlegare varslarsakene.

- Det er vel ingen jenter som har rapportert uønskt åtferd i dette tilfellet. Det å bli teke bilde av på byen er heilt uproblematisk, men det skjedde ingen ting som var ugreitt for nokon, seier Giske.

- Eg skulle sikkert ha sagt nei, men det synest eg er uhøfleg. Eg pleier å seie ja, men det var sikkert ikkje lurt, legg han til.

Trond Giske, her under Arendalsveka i fjor, vart vraka av valkomiteen i Trøndelag Ap. Foto: Terje Pedersen / NTB scanpix