Hopp: Redusert norsk lag vidare i Tyskland
Halvor Egner Granerud var best av dei norske hopparane i kvalifiseringa til verdscuprennet i Titisee-Neustadt. Noreg stiller redusert på grunn av koronasmitte.
Både Daniel-André Tande, Johann André Forfang og Fredrik Villumstad har dei siste dagane testa positivt på koronaviruset. I tillegg står Marius Lindvik over denne helga fordi han er nærkontakt til Tande. Også Robert Johansson står over rennet i helga på grunn av ryggtrøbbel.
Dei fire OL-hopparane Tande, Forfang, Johansson og Lindvik har med det gjort dei siste verdscuphoppa sine før vinterleikane i Kina startar tidleg i februar.
Det var dermed eit sterkt redusert norsk hoppmannskap som sette utfor i den tyske bakken. Rennet i helga erstattar Sapporo, som avlyste på grunn av koronasituasjonen i Japan. Granerud var best av dei norske i eit renn der både Sondre Ringen, Joacim Ødegård Bjøreng og Robin Pedersen sikra avansement og startplass i rennet på laurdag.
Granerud hoppa 134,5 meter, medan Pedersen landa på 130 meter. Ringen og Bjøreng hoppa høvesvis 116,5 og 115 meter. Cene Prevc vann kvalifiseringa med eit hopp på 135,5 meter.
(©NPK)
Halvor Egner Granerud hoppar i verdscuprennet i Tyskland i helga. Foto: Matthias Schrader / AP / NTB