Hoppveka går som planlagt trass mildvêr
Alle renn i den tysk-austerrikske hoppveka har fått godkjenning trass i at mildvêret over Sentral-Europa har sett arrangementet i fare.
Det er den 67. utgåva av den tradisjonsrike hoppturneringa som går av stabelen denne vinteren. Tysdag godkjente arrangørane dei fire bakkane.
Oberstdorf, Garmisch-Partenkirchen, Innsbruck og Bischofshofen har alle tilstrekkeleg med snø. Det er venta at over 100.000 fans vil følgje dei fire renna i Tyskland og Austerrike frå 30. desember til 6. januar.
- Vi har nok snø på alle dei fire stadene, og vi har allereie starta med å preparere bakkane, seier hoppvekepresident Johann Pichler.
Førre sesong kunne polske Kamil Stoch, som den andre hopparen i historia, gå sigrande frå alle dei fire bakkane i éi og same utgåve.
Førstemann var Sven Hannawald som i 50-årsutgåva i 2001/02 vann alt som var å vinne.
Åtte norske hopparar har vunne hoppveka samanlagt, Bjørn Wirkola tre gonger. Den siste var Anders Jacobsen i 2006/07-sesongen.
Daniel-André Tande leidde fram til det siste hoppet i Bischofshofen for to år sidan. Også den gongen vann Stoch.
Best i fjor av dei norske hopparane var Anders Fannemel på tredjeplass.
(©NPK)
Kamil Stoch vann alle dei fire renna i den tysk-austerrikske hoppveka i fjor. No gir arrangørane klarsignal for den 67. utgåva. Foto: Vesa Moilanen / Lehtikuva via AP / NTB scanpix