Hovland avanserer i Texas med bogeyfri runde
Det norske golfesset Viktor Hovland fann fram storspelet på den andre runden av PGA-turneringa i Texas fredag. Han gjekk ein bogeyfri runde fem slag under par.
Etter ein litt treg start torsdag med eitt slag under par, har nordmannen spelt seg godt opp fredag. Med fem birdiar kunne han bokføre ein 65-runde. Det plasserer han på ein førebels delt 5.-plass på seks slag under par. Det skil tre slag opp til leiaren Scott Stallings (USA), men det er fleire bakfrå som kan senke leiarskåren ytterlegare utover dagen.
Hovland starta den andre runden på det tiande holet til banen, og fekk tre par før han spelte seg til to birdiar på rad etter det. Den tredje birdien kom på det 2. holet til banen.
På det 13. holet (banens femte) måtte han kjempe for par, men frå litt over to meter senka han den viktige putten og heldt seg på fire slag under par. Det skulle lønne seg godt då han på holet etter klarte ein ny birdie.
På det neste holet måtte han igjen finne fram dei beste putteigenskapane sine, då han hadde litt over fire meter igjen for par etter å ha hamna i bunkeren. Igjen viste nordmannen styrke og senka nok ein utslagsgivande putt.
På dagens siste hol rulla han i den siste birdien og plasserer seg fint framfor helgas avsluttande rundar.
(©NPK)
Viktor Hovland avanserer på resultatlistene etter ein god andre runde av PGA-turneringa i Texas. Foto: Tony Gutierrez / AP / NTB