India har sett kurs for månen
Den indiske raketten Chandrayaan-2 er på veg mot månen, éi veke etter at oppskytinga måtte utsetjast som følgje av ein drivstofflekkasje.
India har tatt mål av seg til å bli det fjerde landet etter USA, Russland og Kina som landar eit fartøy på månen.
Den indiske presidenten Ram Nath Kovind følgde oppskytinga frå Satish Dhawan-romsenteret på øya Sriharikota, saman med 7.000 andre inviterte og skulebarn med indiske flagg.
Raketten skal bringe eit 2,4 tonn tungt umanna romfartøy opp i bane rundt månen, der det skal sirkle i eitt år, fotografere overflata og sjå etter teikn på vatn.
Om bord i raketten er òg eit landingsfartøy og ein såkalla rover. Roveren er døypt Pragyaan og skal utforske overflata på månen.
(©NPK)
India skaut måndag opp ein rakett som sette kurs for månen. Foto: AP / NTB scanpix