Iran langt unna tapsrekord i VM: Romania vann 39–11
Debutanten Iran skåra åtte mål i andreomgangen i 11–39-kampen mot Romania i handball-VM. Rumenarane mista eit talent med ein alvorleg kneskade i førsteomgangen.
Den iranske målvakta, Fatemeh Khalili Behfar, var den klart beste på sitt lag. Ho hadde fleire fine redningar undervegs mot overmakta. Ved pause leidde Romania 20–3.
Søndag er det Noreg som skal møte dei iranske debutantane. Tysdag speler så Iran og Kasakhstan eit revansjeoppgjer frå Asia-meisterskapen i haust. Då vann Kasakhstan 38–33.
Den største sigeren i VM-historia kom i 2005. Då slo Ungarn Australia 57–9.
Romania manglar den store stjerna si, Cristina Neagu, i VM. Etter vel 18 minutt vart 18-åringen Oana-Doina Bors køyrt ut på båre med det som truleg er ein alvorleg kneskade. Ho skreik av smerte etter eit kontringsforsøk.
Det var den andre kneskaden i VM i år. Dagen før pådrog dansken Mia Rej seg ei vriding. Ho kan ikkje spele meir i meisterskapen.
(©NPK)
Oana-Doina Bors på Romaina (liggjande) pådrog seg truleg ein alvorleg kneskade under VM-kampen mot Iran. Foto: Beate Oma Dahle / NTB
Den iranske målvakta, Fatemeh Khalili Behfar, jublar etter ei redning i VM-kampen i handball mot Romania. Foto: Beate Oma Dahle / NTB
Iranaren Elnaz Ghasemi (f.v.), rumenaren Lorena-Gabriela Ostase og iranaren Hadiseh Noroozi Khorzougho under VM-kampen i handball. Foto: Beate Oma Dahle / NTB