Iran melder om smitterekord
Iranske styresmakter kunngjorde torsdag at landet har registrert 3.574 nye koronatilfelle, det høgaste daglege talet som så langt er registrert.
Det er den fjerde dagen på rad at talet på nye smittetilfelle er over 3.000. Den førre dystre dagsrekorden var på 3.186 nye smitta og vart sett 30. mars.
Epidemien i landet skaut for alvor fart i februar, og situasjonen i slutten av mars markerte toppen på den første smittebølgja.
Talsmannen til helsedepartementet Kianoush Jahanpour opplyser at 59 personar har mista livet av covid-19 i Iran det siste døgnet. Det offisielle dødstalet i landet er dermed 8.071.
(©NPK)