Oljeplattform stengd etter jordskjelv i Nordsjøen
Måndag morgon vart det registrert eit jordskjelv mellom Stad og Færøyane i Nordsjøen. Oljeplattforma Snorre B er stengd som eit føre-var-tiltak etter skjelvet.
Det opplyser Gisle Ledel Johannessen, pressetalsperson i Equinor, til NTB.
– Dei på plattforma merka skjelvet, men ingen er skadde, og dei blir ivarett. Tilbakemeldingane er at stemninga er roleg, og at det ikkje er panikk. Plattforma er stengd som eit føre-var-tiltak. Så langt har vi ikkje fått nokon meldingar om at installasjonar er skadde, verken på plattforma eller langs havbotnen.
Johannessen seier det vil bli sendt ut undervassfartøy for å undersøkje installasjonane på havbotnen.
Kraftigaste sidan 1989
Jordskjelvet hende klokka 6.32 norsk tid. Ifølgje Norsk Nasjonalt Seismisk Nettverk vart skjelvet målt til mellom 4.4 og 4.5 på magnitude-skalaen. NORSAR har målt jordskjelvet, som gjekk 160 kilometer vest for Førde, til 4.7.
– Det er ein del sprikande tal, og det kjem til å variere utover dagen. Det er vanleg. Det europeiske jordskjelvsenteret har registeret skjelvet til 5.1 på skalaen, seier administrerande direktør ved NORSAR, Anne Strømmen Lycke, til NTB.
Jordskjelvet er det kraftigaste som er registert sidan 1989, opplyser direktøren.
– Vi har ein seismologisk stasjon i Karasjok som har registrert skjelvet, så dette har gått langt, seier seismolog Bettina Goertz-Allmann i NORSAR til NTB.
Ikkje meldt personskadar
Operasjonsleiar Eirik Loftesnes i Vest politidistrikt fortalde til NTB måndag morgon at dei hadde fått to førespurnader så langt.
– Dei kjem frå Øygarden og Tysse, så det er snakk om store avstandar her. Folk seier dei blir vekt av at det ristar i huset og klirrar i glasa.
NRK skriv at jordskjelvet kunne merkast i heile Vestland fylke. Også i Rogaland har folk merka jordskjelvet. Operasjonsleiaren seier til NTB at dei førebels ikkje har fått meldingar om personskade eller materielle skadar.
– Skjelvet kunne kjennast på heile Vestlandet, langt inn i fjorden. Folk har kjent det godt, også i Stavanger, seier senioringeniør ved jordskjelvstasjonen ved Universitetet i Bergen, Berit Marie Storheim, til VG.
Ifølgje Storheim er normalt sett ikkje eit jordskjelv langvarig, ofte berre sekund.
Lars Ottemoller, professor i seismologi ved Universitetet i Bergen, seier til Bergens Tidende at så store jordskjelv som på 4.4 blir registrert berre cirka kvart tiande år på Vestlandet.
(©NPK)
Jordskjelvet i Nordsjøen måndag morgon blei registrert på fleire av målestasjonane til forskingsstiftinga NORSAR. Foto: NORSAR / NTB
Oljeplattforma Snorre B er stengd som eit føre-var-tiltak etter jordskjelvet som blei registrert i Nordsjøen tidleg måndag morgon. Foto: Harald Pettersen / Equinor / NTB