Juventus betaler rekordsum for Higuaín

Overgangen er enno ikkje stadfesta av nokon av dei involverte laga, men den offisielle nettstaden til Serie A har lagt ut stadfesting på sine overgangssider.

Ifølgje rapportane pungar den regjerande italienske seriemeisteren ut 850 millionar kroner for spissen, som blei toppscorar i Serie A førre sesong med 36 mål på 35 kampar. Det er ny rekord, argentinaren skåra eitt mål meir enn kva Gunnar Nordahl gjorde i 1950.

Etter at rekorden blei sikra ordna Napoli ein utkjøpsklausul i kontrakten til Higuain som tilsa at ein klubb måtte betale minst 94 millionar euro for å kjøpe fri den tidlegare Real Madrid-spelaren. Det er denne klausulen Juventus no har nytta seg av.

Juventus skal ifølgje italienske Sky Sports dele opp betalinga i to, der det betaler 47 millionar euro i år og 47 nye millionar neste år.

Signeringa er venta å bli presentert på ein pressekonferanse om kort tid. (©NPK)