Kinesisk nettkjendis arrestert for å ha «fornærma» nasjonalsongen
Ein 20 år gammal kinesar med fleire titals millionar følgjarar på internett, er arrestert av politiet i Shanghai for å ha «fornærma» nasjonalsongen.
Yang Kaili framførte nasjonalsongen på ei direktesendt framføring på strøymeplattforma Huya mens ho vifta med armane. Hendinga skjedde 7. oktober. Laurdag blei ho arrestert. Ho må sona fem dagar.
- Nasjonalsongen er eit symbol på landet. Alle borgarar bør respektera songen og ta vare på det verdige ved songen, heiter det i ei fråsegn frå Shanghai-politiet.
- Strøymetenester er ikkje heva over lova. Lova og moral standard gjeld like fullt der, opplyser politiet vidare.
Huya fjerna opptaket og stengde kanalen hennar. Yang, som også er kjend som Li Ge, har i etterkant også offentleg beklaga framføringa, fortel BBC.
- Nasjonalsongen er høgtideleg og burde ikkje framførast frå eit rom der ein strøymer på nettet, skriv Yang i ei melding til følgjarane på den kinesiske Twitter-liknande plattforma Weibo.
- Eg vil stoppa all strøyming, eg vil stramma meg opp, trekkja lærdom frå den bitre hendinga, reflektera djupt og fullt ut godta opptrening i patriotisme og politisk ideologi, skriv ho.
Lova ho er dømd etter, blei innført i fjor haust. Ho opnar for at ein kan bli dømd til opptil 15 dagars fengsel viss man framfører nasjonalsongen på ein respektlaus måte.
(©NPK)