Klart for høyring i Vimpelcom-saka

Dei tidlegare Telenor-toppane Jon Fredrik Baksaas og Svein Aaser har begge takka ja til å stilla i Telenor-høyringa på Stortinget fredag. Telenor-direktør Ole Bjørn Sjulstad har takka nei.

– Det er veldig viktig for Stortinget å koma heilt til botnar i denne saka, med tanke på éin einaste ting, nemleg å finna ut om departementet har gjort det dei skulle, og har følgt nok med, sa komitéleiar Martin Kolberg (Ap) til NTB då kontroll- og konstitusjonskomiteen tidlegare denne månaden samrøystes vedtok å kalla inn til ei ny høyring i den omstridde saka.

Frå Telenor-sfæren kjem dessutan tidlegare styreleiar Gunn Wærsted og den korrupsjonssikta tidlegare Vimpelcom-sjef Jo Lunder.

Telenor-granskarane Ingebret Hisdal og Anne Helsingeng frå revisjonsselskapet Deloitte og Transparency Internationals generalsekretær Guro Slettmark har også takka ja til å koma på høyring fredag.

VimpelCom, der Telenor eig 33 prosent, har erkjent å ha betalt nesten 1 milliard kroner i smørjing til postboksselskapet Takilant i Usbekistan i byte mot lukrative telelisensar. I februar aksepterte selskapet ei bot på om lag 6 milliardar kroner. (©NPK)